РАСМИЙ МУНОСАБАТ

Наманган вилояти Мактабгача таълим бошқармаси жорий йилнинг 12 май куни “Sizdan telegram” ижтимоий тармоғида Давлатобод туман Мактабгача таълим бўлимига қарашли 42-сонли давлат мактабгача таълим ташкилотидаги шароит юзасидан эътироз мазмунида ёритилаган мурожаат бўйича қуйидагиларни маълум қилади.

Давлатобот туманидаги 42-МТТ манзилига қаратилган эътироз ижтимоий тармоқда ёритилган куннинг ўзида шахсан вилоят Мактабгача таълим бошқармаси бошлиғи раҳбарлигида тузилган ишчи гуруҳ томонидан воқеа жойида ўрганилди.

Қайд этилдики, ташкилотнинг ер майдони 1 гектар 0,39 сотих. Биноси 1969 йилда қурилган. Аммо, 2009 йилдагина жорий таъмирдан чиқарилган.

Шугина омилларнинг ўзи масала моҳиятини очиқлайди. Зотан, ўтган 52 йиллик эскириш даври, шунингдек, катта ҳовлидаги ташкилот молиявий имконият сиғимига тўғри келмайдиган ободонлаштириш ҳаражатларининг ортиб кетиши туфайли маълум муаммолар юзага келганлиги табиий. Шунга қарамасдан, уларни бартараф этиш чора-тадбирлари ишлаб чиқилган. Яъни, жорий йилда маҳаллий бюджетнинг ортирилган қисмидан 450 миллион сўм ажратиш кўзда тутилган. Унга кўра, ташкилот биносининг фасад ва том қисмини, ички канализация тармоқларини таъмирлаш ҳамда йўлакларни асфальтлаш ва ёзги айвончалар қуриш режалаштирилган.

Алоҳида қайд этилдики, мазкур мактабгача таълим ташкилотида таълим-тарбия ишлари ижобий йўлга қўйилган. Ҳозирда бу ерда жами  532 нафар тарбияланувчи 22 та гуруҳда тарбияланмоқда. Гуруҳларнинг 7 таси тўлиқ кунлик, 9 таси 6 ёшли мажбурий, 6 таси эса, ривожлантирувчи пулли қисқа муддатли бепул таълимга тайёрлашга йўналтирилган.  

Ташкилотда пандемия шароитида ишлашнинг тўлиқ тартиб-тамойиллари ишлаб чиқилган ва унга риоя этилмоқда.

Ҳудудга нафақат автомашиналар, шунингдек, бегона шахсларни кирғазиш ҳам қатъиян ман этилган. Ота-оналар билан мулоқот қилиш белгиланган тартибда, карантин чизиғидан ташқарида амалга оширилмоқда.

 

Наманган Вилоят Мактабгача таълим бошқармаси Ахборот хизмати

https://telegra.ph/R-A-S-M-I-J-M-U-N-O-S-A-B-A-T-05-13-2

РАСМИЙ МУНОСАБАТ

 Ҳақиқатдан ҳам Уйчи тумани Мактабгача таълим бўлимига қарашли 42-сонли давлат Мактабгача таълим ташкилотининг хўжалик мудири Наргиза Акбарова фаолиятига доир  жорий йил 27 март куни тузилган далолатномага кўра, унинг томонидан ташкилотнинг озиқ-овқат омборида  13 миллион 72 минг 607 сўм камомад аниқланган.

Тегишли далолатномада  қайд этилганки, 2021 йил 29 март куни Наргиза Акбарова томонидан мазкур камомаднинг 1 миллион 133 минг сўм, 30 март куни эса, 1 миллион 693 минг 300 сўм, жами 2 миллион 826 минг 300 сўм қисми қопланган.

Бу ҳақда тегишли ҳужжатлар расмийлаштирилган. Бироқ, ўрганиш кунига қадар муқаддам келтирилган камомаднинг 10 миллион 488 минг 207 сўм қисми қопланмаган. Шунингдек, мазкур ташкилот тарбияланувчилари ҳаётига жидди хавф туғдирувчи синиқ ойна ва ташкилот биносининг том қисми тарновидаги носозликлар ҳақиқатдан ҳам юз берган. Лекин бу ҳолатлар “Asl jamiyat” telegram ижтимоий тармоғида ёритилган мақолани жойида ўрганишга қадар бартараф этилган.

Ўрганиш давомида ташкилотнинг 2-ўрта гуруҳининг кириш эшигида жиддий носозлик узоқ вақтдан буён сақланиб келаётгани аниқланди. Бу носозлик мазкур ташкилот тарбияланувчилари учун жиддий хавф эканлиги тўғрисида хўжалик мудирасига бир неча марта мурожаат қилинган. Бироқ хўжалик мудираси ушбу мурожаатларга нисбатан эътиборсиз муносабатда бўлиб келган.

Ташкилот тарбиячиси  Одина Исматуллаевага кўра, унинг раҳбарлигидаги гуруҳда фойдаланиладиган иссиқ сув тармоғида ҳам узоқ вақт носозлик кузатилган. Ҳатто, ходимлар ушбу носозлик туфайли шикастланган. Қолаверса, бу ҳолат тарбияланувчилар ҳавфсизлигига жиддий таъсир этувчи омил бўлиб келган. Бу ҳақда ҳам хўжалик мудирига бир неча марта билдириш берилган. Аммо, бу носозлик ҳам хўжалик мудири томонидан бартараф этиб берилмагач, гуруҳ тарбиячисининг ўзи ушбу носозликни бартараф этган.

Бундан ташқари, ташкилотнинг Муаттар Холмирзаева, Одина Исматуллаева, Чинихон Турғунова, Шакархон Тошпўлатова сингари ўндан зиёд ходимлари хўжалик мудири Наргиза Акбарованинг иш фаолиятидан норози эканликларини, чунки у, ишга ўз вақтида келмаслигини, оқибатда, болаларга бериладиган тушлик таомлари кечиктириб берилишини таъкидлашди.

Ўрганиш давомида ташкилотнинг хўжалик мудири Наргиза Акбарова билан суҳбатлашилди. Келтирилган камомаднинг шу кунга қадар қопланмаганлигининг сабаби сўриштирилди. Бунга жавобан Наргиза Акбарова ота-она бадал пулини вақтида тўлаб берилмаганлиги боис, камомад сифатида кўрсатилган озиқ-овқат маҳсулотлари  таъминотчи томонидан вақтида етказиб берилмаган эди, кейинчалик, ота-она бадал пули тўлаб берилгандан сўнг ушбу камомад сифатидаги озиқ-овқат маҳсулотлари ташкилот омборига тўлиқ келтирилганлиги ҳусусидаги важлар айтилди ва хўжалик мудирасининг ўзи томонидан, туман Мактабгача таълим бўлими ходимининг иштирокисиз, санасиз, тўлиқ расмийлаштирилмаган далолатномани тақдим этилди, холос.

Ўрганишга “Асадбек Адиба” МЧЖ раҳбари Зокиржон Низамовнинг иштироки таъминланди. У ҳар бир озиқ-овқат маҳсулотини талаб этилган вақтида етказиб берганлигини, бу ҳақда тегишли ҳужжатлари мавжудлигини айтиб ўтди.

Бундан ташқари, ўрганиш жараёнида хўжалик мудири ташкилотда куз-қиш мавсумида сарф қилинган кўмир ёқилғиси ҳақидаги, шунингдек, март ва апрель ойларида сарф этилган озиқ-овқат маҳсулотлари тўғрисидаги ҳисоботларни ҳозирга қадар туман Мактабгача таълим бўлимига топширмай, омбор ва коммунал тўловлар дафтарларини  юритмай келаётганлиги аниқланди.

Юқоридаги ҳолатлар ҳақиқатдан ҳам Уйчи туман МТБга қарашли 42-сонли ДМТТнинг хўжалик молиявий фаолиятини тегишли тартибда тафтиш этиш лозимлигини кўрсатмоқда.

Бу ҳақдаги натижалар келгусида жамоатчиликка маълум қилинади.

 НАМАНГАН ВИЛОЯТИ МАКТАБГАЧА ТАЪЛИМ БОШҚАРМАСИ АХБОРОТ ХИЗМАТИ

БОҒЧАДАГИ КОРРУПЦИЯ – БОЛА ҲАҚИГА ҲИЁНАТДИР

Шундай иллат бор: у ҳамманинг оёғидан чалади; бутун жамият тараққиётини издан чиқаради; давлатни пароканда қилади. Бу – коррупция.

Муҳтарам Президентимиз  таъкидлаганларидек, “Бу ёвуз балонинг олдини олмасак, ҳақиқий ишбилармонлик ва инвестиция муҳитини яратиб бўлмайди, умуман, жамиятнинг бирорта тармоғи ривожланмайди”., деган гапни айтган эди.

Наманган вилояти Мактабгача таълим бошқармасида ўтказилган навбатдаги йиғилиш, айни шу – тизимда коррупцияга қарши кураш борасида амалга оширилган ишлар мавзуга бағишланди.

 

Йиғилишда Мактабгача таълим соҳасида жиноятни келиб чиқиш сабаби ва шарт шароити, уни келгусида бартараф этиш омиллари таҳлил этилди. Дастлаб, бошқарма бош юристконсульти Тохиржон Таджиалиевнинг 2021 йилнинг биринчи чораги давомида тизимда ҳуқуқийликни таъминлаш борасида амалга оширилган ишлар тўғрисидаги ҳисоботи тингланди.

Қайд этилдики, 2020 йилда 8 та жиноят аломатлари кузатилган. Жорий йилнинг шу даврига қадар эса, 6 та жиноятга нисбатан ҳуқуқий баҳо берилган. 

 

 Йиғилишда Наманган вилоят прокуратурасининг алоҳида муҳим жиноятларни тергов қилиш бўлими катта терговчиси Ш.Х.Мамарахимов ҳам иштирок эди. У тизимда фаолият юритувчиларни “коррупциясиз соҳа” шиори остида ишлашга даъват этар экан, жумладан:

– Коррупция шундай иллатки, уни бир ёки икки идоранинг саъй-ҳаракати билан йўқ қилиб бўлмайди. Қачонки, барча фуқароларимиз, жамият, яъни сизу биз бир ёқадан бош чиқариб курашсак, унинг илдизларини йўқ қилишга биргаликда киришсак, албатта, ижобий натижага эриша оламиз. Ўйлайманки,  Мактабгача таълим тизимида ана шундай эзгу мақсад билан ишлаш вақти етди, деди у.

Йиғилишни олиб борган Бошқарма бошлиғи Хилола Юсупова Мактабгача таълим соҳасида бундан буён коррупцияга муросасиз муносабатни шакллантиришга йўналтирилган тизимли чоралар кўрилишини айтди. Қайд этилган ҳолатларни қаттиқ қоралади.

– Кимки, Мактабгача таълим соҳасида жиноятга қўл урибди, демак у, катта жиноятни амалга оширган. Чунки бу ҳол боланинг ҳақига хиёнатдир. Шуни унутмаслигимиз керак: биз азиз ватанимизнинг эртанги келажаги бўлган ворисларимиз тарбиясига масъулмиз. Бугун бизга ишониб топширилган ишонч, шуниси билан ҳам ҳам аҳамиятли, ҳам масъулиятлидир, деди Хилола Юсупова.

Дарҳақиқат, ўз тараққиётининг янги босқичига қадам қўяётган Ўзбекистон учун коррупциянинг ҳар қандай шаклдаги кўриниши ислоҳотлар шиддатини сусайтириши билан хавфли.

Бунга эса, асло йўл қўйиб бўлмайди.

 

Саидолим АБДУРАҲМОНОВ,

Наманган вилояти Мактабгача таълим бошқармаси Ахборот хизмати бошлиғи

https://telegra.ph/BO%D2%92CHADAGI-KORRUPCIYA--BOLA-%D2%B2A%D2%9AIGA-%D2%B2IYONATDIR-04-30

“МИЛЛИЙ ЛИБОС – БОЛА ИФТИХОРИГА АЙЛАНСИН!

Токи у, ҳар жойда ва ҳар қачон ўзбек халқи фарзанди эканлигидан ғурурлансин! деган эзгу ният Наманган шаҳридаги 58-мактабгача таълим ташкилотида Наманган шаҳар прокурори ташаббуси билан ўтказилган “Миллий либосим” мавзусидаги маънавий-маърифий тадбирда тез-тез такрорланди. Зотан, тадбир давомида тарбияланувчи болажонлар миллий либосларимиз қанчалик ярашиқлилиги ва кўркамлилигини, айниқса, жажжи қизалоқлар эгнидаги хон атлас, полвонжон болажонлар бошидаги дўппи эса, ўзбек халқи маънавиятининг кўзгуси эканлигини яна бир карра исбот этиб беришди.

Раҳматли Қаҳрамон шоиримиз Эркин Воҳидовнинг

“...Қайга бормай бошда дўппим,

Ғоз юрарман, гердайиб,

Олам узра номи кетган

Ўзбекистон, ўзбегим”, мисраларини баайни ўзбек кишисининг маънавий ахлоқ ва одоби ҳурматига қурилган ҳайкал, десак муболаға бўлмайди. Аммо...

Минг таассуф! XXI аср – глобаллашган дунё яхши ва ёмонни фарқлай олишни оғирлаштириб қўйди. Агарки, миллий маънавиятимизни бир оппоқ қоғоз, деб тасаввур этсак, надомат билан айтиш жоизки, бу поклик юзасида “қора доғ”лар ҳам пайдо бўла бошлади.

Тўғри. Орамизда ўзининг маънавий-маърифий ахлоқида собит, исталган замон ва маконда Ўзбекистон шаънини бошига кўтариб, ўзининг Ўзбекистон фарзанди эканлиги билан ғурурлана оладиган ва албатта, дунё билан тенгма-тенг тура олишга қодир ёшларимиз жуда кўп. Аммо бошқа тарафда чегара билмас, вақт, макон ва ҳудуд танламайдиган маънавий таҳдидларнинг салбий жиҳатларига қарши тура олмайдиган, айниқса, ўзига “ўта замонавий” тус берган, “Оммавий маданият”га муккасидан кетган, “чет элники” деса, ётиб ялайдиган, энг ёмони миллийликни эскилик сарқити, шахсий эркинликни бўғувчи занжир, маданиятсизлик, дея қарайдиган ёшлар ҳам талайгина.

  

Бир замонлар ҳинд халқи етакчиси Махатма Ганди “Мен таш­қаридаги бўрондан қўрқиб, деразамни ёпиб қўя олмайман, чунки менга тоза ҳаво керак. Шу билан бирга, тоза ҳаво керак экан, деб деразамни катта очиб ҳам қўя олмайман, чунки менинг уйимни чанг – тўзон босиб кетишини хоҳламайман”, деган эди.

Бугун ҳам шундай: дунёда кескин кураш ва рақобат ҳукм сурмоқда, манфаатлар тўқнашуви кучаймоқда. Глобаллашув жараёнлари инсоният учун беқиёс янги имкониятлар билан бирга кутилмаган муаммоларни ҳам келтириб чиқармоқда. Миллий ўзлик ва маънавий қадриятларга қарши таҳдид ва хатарлар тобора ортмоқда. Демак, замоннинг ўзи маънавий жабҳада жипслашишни, бир ёқадан бош чиқаришни тақазо этмоқда. Бу ҳақда Президентимиз "Агар кимдир, маънавият масаласи – бу фақат Маънавият маркази ёки тегишли вазирлик ва идораларнинг иши, деб ўйласа, хато қилади. Буларнинг барчаси олдимизда турган энг асосий, энг муҳим вазифалардан биридир” дея таъкидлаган эдилар. 

Бўлиб ўтган тадбир баайни Президент чақириғига ҳамоҳанг бўлди. Унда иштирок этган Наманган шаҳар прокурорининг ўринбосари Хуршидбек Умирзоқов “Миллий либосим” маънавий-маърифий тадбирининг кўргазмали чиқишида эътибор қозонган жажжи тарбияланувчиларнинг барчасига совғалар улашди. Шунингдек:

– Тарбияда танаффус бўлмайди, – дея таъкидлади Хуршидбек Умирзоқов. – Лекин, бу жабҳадаги ишларнинг узвийлиги ҳозирча етарли эмас. Масалан, мазкур боғчада ўтаётган ушбу тадбирга шу ҳудуддаги мактаб, олий таълим, маҳалла, ота-она келиши керак эди. Зотан, Президентимиз бугунги кунда биздан, энг аввало, маънавий-маърифий ишларни амалга оширишда ягона тизим бўлиб ҳаракат қилишимизни, ўғил-қизларимизни болалигиданоқ билимли ва фазилатли этиб тарбиялаш мақсадида мактабгача таълим ташкилотларига кўмак кўрсатишимиз зарурлигини сўраяптилар. Биз бунга жавоб беришимиз керак.

Дарҳақиқат, Ўзбекистон мафкураси – эзгулик, одамийлик, гуманизм ғояси! Бунда фикр тарбияси, миллий ва умуминсоний қадриятлар тарбияси халқимизнинг неча минг йиллик ҳаётий тушунча ва қадриятларига асосланади. Демак, бундай мақсад рўёби учун ҳамма масъул: болани дунёга келтирган ота-она ҳам, унинг тарбиясини зиммасига олган тарбиячи ҳам, таълим ўқитувчиси ҳам, маҳалла ҳам ва маҳалладаги нуроний ҳам, зиёлий ҳам!

 

Бироқ, айрим жойларда ўқтин-ўқтин бўлса ҳам Президент Шавкат Мирзиёев куюниб, ёниб кўзлаётган манзараларнинг аксини кўриб қоляпмиз. Бундай ҳолатлар ташкилотларнинг директорлари, методистлари ўртасида тарихий, ва миллий қадриятлар сабоғини кучайтиришни тақазо этади. Зотан, бола ишонса, қаттиқ ишонади ва ундаги бу ишонч сценарийси саёз, қўлдан ўтарга, раҳбарлар кўрсин учун тайёрланган тадбирлар воситасида йўл қўйилган хатоликлар унинг бутун умрига салбий таъсир этиши мумкин.

Афсуски, Наманган вилоят Мактабгача таълим бошқармасининг назорат нигоҳига ташкилотларда ўтказилаётган тадбирлар савясининг пастлиги, уларнинг кўплари фақат рақсвозлик асосида ўтказилаётганлиги билан боғлиқ муаммолар ҳам келиб тушмоқда. Ҳолбуки, “Узлуксиз маънавий тарбия концепцияси”нинг тегишли бандларида “Мактабгача таълим муассасалари тарбияланувчилари учун тайёрланадиган спектакллар, куй-қўшиқ ва рақслар, турли театрлаштирилган томошалар, саҳна кўринишлари, миллий ўйинлар сценарийларини ишлаб чиқиш” зарурлиги айтилади.

 

Энг ачинарлиси, ҳатто, миллий либослар кўргазмасига бағишланган тадбирларда ҳам ғарбга тақлидни сезиб қоласан; хушинг айрилади: чиройли хон атласдан либос кийган жажжи қизалоқ ўртага юриб келади-да, аллақандай, ғарбликларга хос қилиқлар қилиб, саҳнадан чиқиб кетади.

Кўриб хайрон қоласан, нима бу? Миллийлик, деб миллийликдан юз ўгиришми? Қани, ўзбекона салом, такаллуф, назокат, тавозе?

Қани, миллий руҳ?

Ахир болар эгнига миллий либос кийдиришдан кўзлаган мақсадимиз улар шуурида ўзбекона маънавиятни, ахлоқ-одобни шакллантириш эмасми? Айтинг, қандай одам ўзи ичмоқчи бўлган сувни лойқалатиб ичади?

Наманган шаҳридаги 58-сонли Давлат мактабгача таълим ташкилотида амалга оширилган мазкур тадбир бундай қусурлардан ҳоли ўтди. Тарбияланувчилар ўз эгниларидаги миллий либослар, шу билан бирга, улар ижросида куй-қўшиқ, мақомчилик йўналишида эса, “муножот” ва “тановор” рақслари, баҳру-байт беллашуви ва айниқса, ўзбек халқ эртак қаҳрамонлари тимсолида саломлашиш одобига  бағишлаб тайёрланган саҳна кўриниши намойиш этилди.

 

Анжон дўппи, Марғилон дўппи, Чуст дўппи кийган болажонлар барчанинг эътиборини қозонди. Атоқли шоир Муҳаммад Юсуфнинг

Бу қандайин кўргулик савдо, 

Дўппи киймай қўйди халойиқ.

Бошга лойиқ дўппи йўқдир ё – 

Бош қолмади дўппига лойиқ,  деб ёзган армонларини ушалтириб, шоирнинг руҳини шод этишди.

Саидолим АБДУРАҲМОНОВ,

Наманган вилоят Мактабгача таълим бошқармаси маънавий-маърифий ишлар ва давлат тилида иш юритиш бўйича бош мутахассиси, вилоят “Маърифат” тарғиботчилар гуруҳи аъзоси

https://telegra.ph/MILLIJ-LIBOS--BOLA-IFTIHORIGA-AJLANSIN-04-29